chaussetrape

Chaussetrape, f. penacut. Est un petit engin de fer à quatre poinctes aiguës, dont (comme descrit Vegece li. 3. ch. 24.) les trois l'appuyent, et la quatriéme est dressée amont, et est celle qui picque. Ceux qui fuyent s'en servent, en semant plusieurs par où ils s'evadent, et mesme à heure nocturne, à ce que ceux qui les poursuyvent, s'enferrent courants apres eux, et se blessent les pieds, ou de leurs chevaux, ou soient detenus de crainte de s'enferrer, et par ce moyen puissent les fuyards prendre la garite. Ainsi est dit és Annales de Nicole Gilles, que les assassinateurs du Duc d'Orleans se retrayants à l'hostel du Duc de Bourgongne, jettoient derriere eux en fuyant plusieurs chaussetrapes, ou bien pour empescher l'abbord de la cavalerie des ennemis, comme feit Darius, au recit de Q. Curtius livr. 4. et les Romains contre les chars à faux des Rois Antiochus et Mithridates, ou pour empescher les saillies des assiegez, ce que faire fut conseillé à Scipion Aemilian tenant une ville assiegée, comme est en Valere livr. 3. Murex ferreus, ainsi l'appellent Curtius et Valere esdits lieux, ou Tribulus, qui est le nom que Vegece audit passage luy donne, le descrivant, Propugnaculum quatuor spiculis confixum, quod quoquomodo abieceris, tribus radiis stat, et erecto quarto infestum est. Et est pur Grec {{t=g}}tribolos,{{/t}} auquel Plutarque adjousté {{t=g}}bidêros,{{/t}} la raison duquel mot d'icelle ferrée machine de guerre, est tirée de la figure de l'herbe appelée Tribulus, dont est faite mention au 57. chapitre de Saint Matthieu, et 6. de l'Epistre aux Hebrieux, et au 4. livr. chap. 14. de Dioscoride, et au livr. 3. de Theophraste, ou parce (comme dit Dioscoride) que le Tribulus aquatique elevant le crein, resconce ses picquons, aussi les chaussetrapes (comme feit ledit Darius) se mettent souvent entre deux terres, pour les celer à l'ennemy, ou parce que ladite herbe porte la graine à trois picquons, Budée estant d'opinion que ladite chaussetrape est aussi tost à trois poinçons, comme à quatre, Murex.

Une herbe qu'on appelle chaussetrape, c'est aussi un fruit qu'on appelle chastaigne de riviere, ou truffes, ou saligots, Tribulus.

Thresor de la langue françoyse. Jean Nicot.